ಆದರೆ ಜರತುಷ್ಟ್ರನು ಜನರನ್ನು ನೋಡಿ ಆಶ್ಚರ್ಯಪಟ್ಟನು. ನಂತರ ಹೀಗೆ ಹೇಳಿದನು:
ಮಾನವನು ಪ್ರಾಣಿ ಮತ್ತು ಅತಿಮಾನವನ ನಡುವೆ ಕಟ್ಟಿದ ಹಗ್ಗದಂತೆ—ಒಂದು ಆಳವಾದ ಪ್ರಪಾತದ ಮೇಲೆ ಕಟ್ಟಲಾಗಿರುವ ಹಗ್ಗವಿದು.
ಇದೊಂದು ಅಪಾಯಕರ ದಾಟುವಿಕೆ, ಅಪಾಯಕರ ಪ್ರಯಾಣ, ಹಿಂತಿರುಗಿ ನೋಡುವುದೂ ಅಪಾಯಕರ ಮತ್ತು ನಡುಕ ಹಾಗೂ ತಡಕಾಡುವಿಕೆಯೂ ಅಪಾಯಕರ.
ಮಾನವನಲ್ಲಿರುವ ಶ್ರೇಷ್ಠ ಗುಣವೆಂದರೆ, ಅವನು ಕೇವಲ ಒಂದು ಸೇತುವೆ, ಅಂತಿಮ ಗುರಿಯಲ್ಲ: ಮಾನವನಲ್ಲಿ ಪ್ರೀತಿಗೆ ಅರ್ಹವಾದ ಗುಣವೆಂದರೆ, ಅವನು "ದಾಟುವವನು" ಮತ್ತು "ತನ್ನನ್ನು ತ್ಯಜಿಸಿಕೊಳ್ಳುವ ಗುಣವುಳ್ಳವನು".
ತಮ್ಮನ್ನು ತಾವು ತ್ಯಜಿಸಿ ಬದುಕುವ ವಿನಃ ಬೇರೆ ರೀತಿ ತಿಳಿಯದವರನ್ನು ನಾನು ಪ್ರೀತಿಸುತ್ತೇನೆ, ಏಕೆಂದರೆ ಅವರೇ ಈ ದಾಟುವವರು.
ನಾನು ಮಹತ್ತರವಾಗಿ ತಿರಸ್ಕರಿಸುವವರನ್ನು ಪ್ರೀತಿಸುತ್ತೇನೆ, ಏಕೆಂದರೆ ಅವರೇ ಮಹಾ ಆರಾಧಕರು; ಅವರು ಇನ್ನೊಂದು ತೀರದತ್ತ ಹಾರುವ ಬಾಣಗಳಂತಿದ್ದಾರೆ.
ಯಾರು ನಕ್ಷತ್ರಗಳಾಚೆಗಿನ ಕಾರಣಗಳಿಗಾಗಿ ಅರ್ಪಿಸಿಕೊಳ್ಳಲು ಕಾಯದೆ, ಈ ಭೂಮಿಗಾಗಿ ತಮ್ಮನ್ನು ತಾವು ಅರ್ಪಿಸಿಕೊಳ್ಳುತ್ತಾರೋ ಅವರನ್ನು ನಾನು ಪ್ರೀತಿಸುತ್ತೇನೆ; ಇದರಿಂದ ಅತಿಮಾನವರ ಭೂಮಿಯು ಉದಯವಾಗಲಿ.
ಯಾರು ಜ್ಞಾನಕ್ಕಾಗಿ ಬದುಕುತ್ತಾರೋ ಮತ್ತು ಅತಿಮಾನವರ ಕಲ್ಯಾಣಕ್ಕಾಗಿ ಸಂಗತಿಗಳನ್ನು ತಿಳಿದುಕೊಳ್ಳಲು ಬಯಸುತ್ತಾರೋ, ಅವರನ್ನು ನಾನು ಪ್ರೀತಿಸುತ್ತೇನೆ. ಈ ರೀತಿಯಾಗಿ ಅವರು ತಮ್ಮ ಅಂತ್ಯವನ್ನು ಕಂಡುಕೊಳ್ಳುತ್ತಾರೆ.
ಅತಿಮಾನವನಿಗಾಗಿ ಮನೆ ಕಟ್ಟಲು ಮತ್ತು ಭೂಮಿ, ಪ್ರಾಣಿ ಹಾಗೂ ಸಸ್ಯಗಳನ್ನು ಸಿದ್ಧಪಡಿಸಲು ಯಾರು ಶ್ರಮಿಸುತ್ತಾರೋ ಮತ್ತು ಹೊಸದನ್ನು ಕಂಡುಹಿಡಿಯುತ್ತಾರೋ ಅವರನ್ನು ನಾನು ಪ್ರೀತಿಸುತ್ತೇನೆ: ಏಕೆಂದರೆ ಹೀಗೆಯೇ ಅವರು ಸ್ವತಃ ತಮ್ಮನ್ನು ಅಂತ್ಯ ಮಾಡಿಕೊಳ್ಳಲು ಬಯಸುತ್ತಾರೆ.
ಯಾರು ತಮ್ಮಲ್ಲಿನ ಸದ್ಗುಣಗಳನ್ನು ಪ್ರೀತಿಸುತ್ತಾರೋ ಅವರನ್ನು ನಾನು ಪ್ರೀತಿಸುತ್ತೇನೆ: ಏಕೆಂದರೆ ಸದ್ಗುಣ ಎಂಬುದು ತನ್ನನ್ನು ತಾನು ಅರ್ಪಿಸಿಕೊಳ್ಳುವ ಇಚ್ಛೆ ಮತ್ತು ಹಂಬಲದ ಬಾಣವಾಗಿದೆ.
ಯಾರು ತನ್ನ ಆತ್ಮದ ಯಾವುದೇ ಭಾಗವನ್ನು ತನಗಾಗಿ ಉಳಿಸಿಕೊಳ್ಳದೆ, ಸಂಪೂರ್ಣವಾಗಿ ತನ್ನ ಸದ್ಗುಣದ ಸ್ಫೂರ್ತಿಯಾಗಲು ಬಯಸುತ್ತಾರೋ ಅವರನ್ನು ನಾನು ಪ್ರೀತಿಸುತ್ತೇನೆ: ಹೀಗೆ ಅವರು ಸೇತುವೆಯ ಮೇಲೆ ಸ್ಫೂರ್ತಿಯಂತೆ ನಡೆಯುತ್ತಾರೆ.
ಯಾರು ತಮ್ಮ ಸದ್ಗುಣವನ್ನೇ ತಮ್ಮ ಆಸೆ ಮತ್ತು ವಿಧಿಯನ್ನಾಗಿ ಮಾಡಿಕೊಳ್ಳುತ್ತಾರೋ ಅವರನ್ನು ನಾನು ಪ್ರೀತಿಸುತ್ತೇನೆ: ಆದ್ದರಿಂದ, ತನ್ನ ಸದ್ಗುಣಕ್ಕಾಗಿ ಅವರು ಬದುಕಲು ಅಥವಾ ಸಾಯಲು ಸಿದ್ಧರಿರುತ್ತಾರೆ.
ಯಾರು ಅತಿಯಾದ ಸದ್ಗುಣಗಳನ್ನು ಬಯಸುವುದಿಲ್ಲವೋ ಅವರನ್ನು ನಾನು ಪ್ರೀತಿಸುತ್ತೇನೆ. ಎರಡು ಸದ್ಗುಣಗಳಿಗಿಂತ ಒಂದು ಸದ್ಗುಣವೇ ಲೇಸು, ಏಕೆಂದರೆ ಅದು ಹಣೆಬರಹವು ಗಟ್ಟಿಯಾಗಿ ಹಿಡಿದುಕೊಳ್ಳಲು ಅನುಕೂಲವಾದ ಒಂದು ಗಂಟು.
ಯಾರ ಆತ್ಮವು ಉದಾರವಾಗಿದೆಯೋ, ಯಾರು ಕೃತಜ್ಞತೆಯನ್ನು ಬಯಸುವುದಿಲ್ಲವೋ ಮತ್ತು ಪ್ರತಿಯಾಗಿ ಏನನ್ನೂ ಕೇಳುವುದಿಲ್ಲವೋ ಅವರನ್ನು ನಾನು ಪ್ರೀತಿಸುತ್ತೇನೆ: ಏಕೆಂದರೆ ಅವನು ಯಾವಾಗಲೂ ನೀಡುತ್ತಾನೆ ಮತ್ತು ತನಗಾಗಿ ಏನನ್ನೂ ಇಟ್ಟುಕೊಳ್ಳಲು ಬಯಸುವುದಿಲ್ಲ.
ಯಾರು ಅದೃಷ್ಟದಿಂದ ಗೆದ್ದಾಗ ಲಜ್ಜೆಯಿಂದ "ನಾನು ಮೋಸದ ಆಟಗಾರನೇ?" ಎಂದು ಕೇಳಿಕೊಳ್ಳುತ್ತಾರೋ ಅವರನ್ನು ನಾನು ಪ್ರೀತಿಸುತ್ತೇನೆ—ಏಕೆಂದರೆ ಅವರು ಸೋಲನ್ನು ಒಪ್ಪಿಕೊಳ್ಳಲು ಸಿದ್ಧರಿರುತ್ತಾರೆ.
ಯಾರು ಕೆಲಸ ಮಾಡುವ ಮೊದಲೇ ಒಳ್ಳೆಯ ಮಾತುಗಳನ್ನಾಡಿ ಮತ್ತು ಹೇಳಿದ್ದಕ್ಕಿಂತ ಹೆಚ್ಚು ಕೆಲಸ ಮಾಡುತ್ತಾರೋ ಅವರನ್ನು ನಾನು ಪ್ರೀತಿಸುತ್ತೇನೆ: ಏಕೆಂದರೆ ಅವರು ತಮ್ಮ ಸ್ವಂತ ಸಮರ್ಪಣೆಯನ್ನು ಹುಡುಕುತ್ತಾರೆ.
ಯಾರು ಭವಿಷ್ಯದ ಜನರನ್ನು ಸಮರ್ಥಿಸುತ್ತಾರೋ ಮತ್ತು ಭೂತಕಾಲದ ಜನರನ್ನು ವಿಮೋಚಿಸುತ್ತಾರೋ ಅವರನ್ನು ನಾನು ಪ್ರೀತಿಸುತ್ತೇನೆ: ಏಕೆಂದರೆ ಈ ವರ್ತಮಾನದ ಜನರಿಗಾಗಿ ಅವರು ಅಳಿಯಲು ಸಿದ್ಧರಿರುತ್ತಾರೆ.
ಯಾರು ತಮ್ಮ ದೇವರನ್ನು ಪ್ರೀತಿಸುವ ಕಾರಣಕ್ಕಾಗಿಯೇ ದೇವರನ್ನು ದಂಡಿಸುತ್ತಾರೋ ಅವರನ್ನು ನಾನು ಪ್ರೀತಿಸುತ್ತೇನೆ: ಏಕೆಂದರೆ ಅವರು ತಮ್ಮ ದೇವರ ಕೋಪದಿಂದಲೇ ಅಳಿಯಬೇಕು.
ಯಾರ ಆತ್ಮವು ಗಾಯಗೊಂಡಾಗಲೂ ಆಳವಾಗಿರುತ್ತದೆಯೋ ಮತ್ತು ಸಣ್ಣ ವಿಷಯಕ್ಕಾಗಿಯೂ ಸಾಯಬಲ್ಲರೋ ಅವರನ್ನು ನಾನು ಪ್ರೀತಿಸುತ್ತೇನೆ: ಹೀಗಾಗಿ ಅವರು ಇಷ್ಟಪಟ್ಟು ಸೇತುವೆಯನ್ನು ದಾಟುತ್ತಾರೆ.
ಯಾರ ಆತ್ಮವು ತುಂಬಿ ತುಳುಕುತ್ತಿದ್ದು ಅವರು ತನ್ನನ್ನೇ ಮರೆಯುತ್ತಾರೋ ಮತ್ತು ಎಲ್ಲವೂ ಅವನಲ್ಲಿಯೇ ಇದೆಯೋ ಅವನನ್ನು ನಾನು ಪ್ರೀತಿಸುತ್ತೇನೆ: ಹೀಗೆ ಎಲ್ಲವೂ ಅವರ ಅಂತ್ಯಕ್ಕೆ ದಾರಿಯಾಗುತ್ತದೆ.
ಮುಕ್ತ ಮನಸ್ಸು ಮತ್ತು ಮುಕ್ತ ಹೃದಯ ಹೊಂದಿರುವವರನ್ನು ನಾನು ಪ್ರೀತಿಸುತ್ತೇನೆ: ಅವರ ತಲೆ ಕೇವಲ ಹೃದಯದ ಆಜ್ಞೆಯನ್ನು ಪಾಲಿಸುತ್ತದೆ; ಆದರೆ ಅವರ ಹೃದಯವೇ ಅವರ ಅಂತ್ಯಕ್ಕೆ ಕಾರಣವಾಗುತ್ತದೆ.
ಮಾನವರ ಮೇಲೆ, ಕಪ್ಪು ಮೋಡದಿಂದ ಒಂದೊಂದಾಗಿ ಬೀಳುವ ಭಾರವಾದ ಮಳೆಹನಿಗಳಂತಿರುವ ಎಲ್ಲರನ್ನೂ ನಾನು ಪ್ರೀತಿಸುತ್ತೇನೆ: ಅವರು ಮಿಂಚಿನ ಆಗಮನದ ಸಂದೇಶ ಹೊತ್ತು ತಂದು ದೂತರಾಗಿಯೇ ಸಾಯುತ್ತಾರೆ.
ನೋಡಿ, ನಾನು ಮಿಂಚಿನ ಆಗಮನದ ಸಂದೇಶ ಹೊತ್ತು ತಂದಿರುವ ಕಪ್ಪು ಮೋಡದ ಒಂದು ಭಾರವಾದ ಹನಿ: ಆದರೆ, ಆ ಮಿಂಚೇ ಅತಿಮಾನವ.
0 ಕಾಮೆಂಟ್‌(ಗಳು):
ಕಾಮೆಂಟ್‌ ಪೋಸ್ಟ್ ಮಾಡಿ