29. ಜೇಡಗಳ ಬಗ್ಗೆ

ನೋಡಿ, ಇದೇ ಜೇಡದ ಗುಹೆ! ಜೇಡವನ್ನು ನೋಡಬೇಕೆ? ಇಲ್ಲಿ ಅದರ ಬಲೆ ನೇತಾಡುತ್ತಿದೆ: ಅದನ್ನು ಸ್ಪರ್ಶಿಸಿ. ಅದು ಕಂಪಿಸಲಿ.

ಅದು ತನ್ನಿಚ್ಚೆಯಿಂದಲೇ ಬರುತ್ತಿದೆ ನೋಡಿ: ಸ್ವಾಗತ, ಜೇಡವೇ! ನಿನ್ನ ಬೆನ್ನಿನ ಮೇಲೆ ಕಪ್ಪು ತ್ರಿಕೋನ ಮತ್ತು ನಿನ್ನ ಗುರುತಿದೆ; ಮತ್ತು ನಿನ್ನ ಆತ್ಮದೊಳಗೆ ಏನಿದೆ ಎಂಬುದು ಸಹ ನನಗೆ ತಿಳಿದಿದೆ.

ನಿನ್ನ ಆತ್ಮದಲ್ಲಿ ಪ್ರತೀಕಾರವಿದೆ: ನೀನೆಲ್ಲಿ ಕಚ್ಚುವೆಯೋ ಅಲ್ಲಿ ಕಪ್ಪು ಹುಣ್ಣು ಬೆಳೆಯುವುದು; ನಿನ್ನ ವಿಷ ಪ್ರತೀಕಾರದಿಂದ ಆತ್ಮಕ್ಕೆ ತಲೆಸುತ್ತು ಬರಿಸುವುದು.!

ಆದ್ದರಿಂದಲೇ ನಾನು ನಿಮ್ಮೊಂದಿಗೆ ರೂಪಕದಲ್ಲಿ ಮಾತನಾಡುತ್ತೇನೆ, ಆತ್ಮಗಳಿಗೆ ತಲೆಸುತ್ತು ಬರಿಸುವವರೇ, ಸಮಾನತೆಯ ಪ್ರಚಾರಕರೇ! ನೀವು ನನಗೆ ಜೇಡಗಳಂತೆ ಕಾಣುತ್ತೀರಿ—ಗುಪ್ತ ಪ್ರತೀಕಾರಿಗಳಂತೆ!

ಆದರೆ ನಾನು ನಿಮ್ಮ ಅಡಗುತಾಣಗಳನ್ನು ಬೆಳಕಿಗೆ ತರುತ್ತೇನೆ: ಆದ್ದರಿಂದಲೇ ನಾನು ನಿಮ್ಮ ಮುಖದ ಮುಂದೆ ಈ ಎತ್ತರದ ನಗುವನ್ನು ನಗುತ್ತಿದ್ದೇನೆ.

ಅದಕ್ಕಾಗಿಯೇ ನಾನು ನಿಮ್ಮ ಬಲೆಯನ್ನು ಎಳೆಯುತ್ತಿದ್ದೇನೆ, ನಿಮ್ಮ ಕೋಪವು ನಿಮ್ಮ ಸುಳ್ಳಿನ ಗುಹೆಯಿಂದ ಹೊರಬರಲೆಂದು, ಮತ್ತು ನಿಮ್ಮ “ನ್ಯಾಯ” ಎಂಬ ಪದದ ಹಿಂದೆ ಅಡಗಿರುವ ಪ್ರತೀಕಾರ ಹೊರಗೆ ಹಾರಿಬರಲೆಂದು.

ಏಕೆಂದರೆ ಮನುಷ್ಯನು ಪ್ರತೀಕಾರದಿಂದ ವಿಮುಕ್ತನಾಗಬೇಕು—ಇದೇ ನನಗೆ ಅತ್ಯುನ್ನತ ಭರವಸೆಯ ಸೇತುವೆ, ದೀರ್ಘ ಬಿರುಗಾಳಿಗಳ ನಂತರ ಕಾಣುವ ಮಳೆಬಿಲ್ಲು.

ಆದರೆ ಜೇಡಗಳು ಬೇರೆ ರೀತಿಯಲ್ಲಿ ಬಯಸುತ್ತವೆ. “ಜಗತ್ತು ನಮ್ಮ ಪ್ರತೀಕಾರದ ಬಿರುಗಾಳಿಯಿಂದ ತುಂಬಿರಲಿ—ಅದೇ ನ್ಯಾಯ!” ಎಂದು ಅವು ಪರಸ್ಪರ ಮಾತನಾಡಿಕೊಳ್ಳುತ್ತವೆ.

"ಯಾರು ನಮ್ಮಂತಿಲ್ಲವೋ ಅವರೆಲ್ಲರ ಮೇಲೆ ನಾವು ಸೇಡು ತೀರಿಸಿಕೊಳ್ಳುತ್ತೇವೆ ಮತ್ತು ಅವರನ್ನು ಅವಮಾನಿಸುತ್ತೇವೆ"—ಎಂದು ಈ ಜೇಡದ ಹೃದಯಗಳು ತಮಗೆ ತಾವೇ ಪ್ರತಿಜ್ಞೆ ಮಾಡಿಕೊಳ್ಳುತ್ತವೆ.

"ಮತ್ತು 'ಸಮಾನತೆಯ ಇಚ್ಛೆ'—ಅದೇ ಇನ್ನು ಮುಂದೆ ಸದ್ಗುಣದ ಹೆಸರಾಗಲಿ; ಮತ್ತು ಅಧಿಕಾರವಿರುವ ಎಲ್ಲದರ ವಿರುದ್ಧ ನಾವು ಕೂಗೆಬ್ಬಿಸುತ್ತೇವೆ!" ಎನ್ನುತ್ತವೆ.

ಓ ಸಮಾನತೆಯ ಬೋಧಕರೇ, ಅಸಹಾಯಕತೆಯ ಹುಚ್ಚುತನವು ನಿಮ್ಮ ಒಳಗಿಂದ "ಸಮಾನತೆ"ಗಾಗಿ ಕೂಗುತ್ತಿವೆ: ನಿಮ್ಮ ಆಳದ ದಬ್ಬಾಳಿಕೆಯ ಆಸೆಗಳು ಸದ್ಗುಣದ ಪದಗಳ ಹಿಂದೆ ಅಡಗಿವೆ!

ನಿಗ್ರಹಿಸಲ್ಪಟ್ಟ ಅಹಂಕಾರ ಮತ್ತು ಒತ್ತಿಹಾಕಲ್ಪಟ್ಟ ಅಸೂಯೆ—ಬಹುಶಃ ನಿಮ್ಮ ತಂದೆಯರ ಅಹಂಕಾರ ಮತ್ತು ಅಸೂಯೆ—ನಿಮ್ಮೊಳಗೆ ಬೆಂಕಿಯಂತೆ ಮತ್ತು ಪ್ರತೀಕಾರದ ಹುಚ್ಚಿನಂತೆ ಸಿಡಿಯುತ್ತವೆ.

ತಂದೆಯಲ್ಲಿ ಮರೆಯಾದದ್ದು ಮಗನಲ್ಲಿ ಹೊರಬರುತ್ತದೆ; ಮತ್ತು ಹಲವು ಬಾರಿ ಮಗನು ತಂದೆಯ ರಹಸ್ಯಗಳನ್ನು ಬಯಲು ಮಾಡಿರುವುದು ನಾನು ಕಂಡಿದ್ದೇನೆ.

ಅವರು ಪ್ರೇರಿತರಂತೆ ಕಾಣುತ್ತಾರೆ: ಆದರೆ ಅವರನ್ನು ಪ್ರೇರೇಪಿಸುವುದು ಹೃದಯವಲ್ಲ, ಬದಲಿಗೆ ಸೇಡು. ಮತ್ತು ಅವರು ಸೂಕ್ಷ್ಮ ಹಾಗೂ ಕಠೋರವಾದಾಗ, ಅದಕ್ಕೆ ಕಾರಣ ಅಸೂಯೆಯೇ ಹೊರತು ಚೈತನ್ಯವಲ್ಲ.

ಅವರ ಅಸೂಯೆ ಅವರನ್ನು ಚಿಂತಕರ ಮಾರ್ಗಕ್ಕೂ ಕರೆದೊಯ್ಯುತ್ತದೆ; ಮತ್ತು ಇದೇ ಅವರ ಅಸೂಯೆಯ ಲಕ್ಷಣ—ಅವರು ಯಾವಾಗಲೂ ಮಿತಿಮೀರಿಹೋಗುತ್ತಾರೆ; ಕೊನೆಗೆ ಅವರ ಆಯಾಸ ಹಿಮದ ಮೇಲೆ ಕುಸಿದು ಬೀಳುತ್ತಾರೆ.

ಅವರ ಎಲ್ಲಾ ದೂರುಗಳಲ್ಲೂ ಪ್ರತೀಕಾರ ಕೇಳಿಸುತ್ತದೆ; ಅವರ ಎಲ್ಲಾ ಹೊಗಳಿಕೆಗಳಲ್ಲೂ ವಿಷವಿದೆ; ಮತ್ತು ತೀರ್ಪುಗಾರರಾಗುವುದೇ ಅವರಿಗೆ ಪರಮಾನಂದದಂತೆ ತೋರುತ್ತದೆ.

ನನ್ನ ಸ್ನೇಹಿತರೇ, ನಾನು ನಿಮಗೆ ಈ ಸಲಹೆ ನೀಡುತ್ತೇನೆ: ಯಾರಲ್ಲಿ ಶಿಕ್ಷಿಸುವ ಹಂಬಲ ಹೆಚ್ಚಿರುವವರನ್ನು ನಂಬಬೇಡಿ!

ಅವರು ಕೆಟ್ಟ ಸಂತತಿಗೆ ಸೇರಿದವರು; ಅವರ ಮುಖಗಳಲ್ಲಿ ಕೊಲೆಗಡುಕ ಮತ್ತು ಬೇಟೆನಾಯಿಯ ಲಕ್ಷಣಗಳು ಕಾಣುತ್ತವೆ.

ತಮ್ಮ ನ್ಯಾಯದ ಬಗ್ಗೆ ಹೆಚ್ಚು ಮಾತನಾಡುವವರನ್ನು ನಂಬಬೇಡಿ! ನಿಜವಾಗಿಯೂ, ಅವರ ಆತ್ಮಗಳಲ್ಲಿ ಕೇವಲ ಜೇನಿನ ಕೊರತೆ ಮಾತ್ರ ಇರುವುದಿಲ್ಲ.

ಮತ್ತು ಅವರು ತಮ್ಮನ್ನು ತಾವು "ಒಳ್ಳೆಯವರು ಮತ್ತು ನ್ಯಾಯವಂತರು" ಎಂದು ಕರೆದುಕೊಂಡಾಗ, ಅವರಿಗೆ ಫಾರಸಿಗಳಾಗಲು ಬೇಕಾಗಿರುವುದು ಕೇವಲ—ಶಕ್ತಿ ಮಾತ್ರ ಎಂಬುದನ್ನು ಮರೆಯಬೇಡಿ!!

ನನ್ನ ಸ್ನೇಹಿತರೇ, ನಾನು ಇತರರೊಂದಿಗೆ ಮಿಶ್ರಣವಾಗಲು ಬಯಸುವುದಿಲ್ಲ.

ನನ್ನ ಜೀವನದ ಬೋಧನೆಯನ್ನು ಪ್ರಚಾರ ಮಾಡುವ ಕೆಲವರಿದ್ದಾರೆ: ಆದರೆ ಅದೇ ಸಮಯದಲ್ಲಿ ಅವರು ಸಮಾನತೆಯ ಬೋಧಕರು ಮತ್ತು ಜೇಡಗಳೂ ಆಗಿದ್ದಾರೆ.

ಈ ವಿಷಕಾರಿ ಜೇಡಗಳು ತಮ್ಮ ಬಲೆಯಲ್ಲಿ ಅಡಗಿ ಕುಳಿತು ಜೀವನದಿಂದ ಮುಖ ತಿರುಗಿಸಿದ್ದರೂ, ಜೀವನದ ಪರವಾಗಿ ಮಾತನಾಡುತ್ತಿವೆ. ಕಾರಣ ಇತರರಿಗೆ ನೋವು ನೀಡಲು ಮಾತ್ರ.

ಈಗ ಅಧಿಕಾರದಲ್ಲಿರುವವರಿಗೆ ನೋವು ನೀಡಲು ಅವರು ಬಯಸುತ್ತಾರೆ: ಏಕೆಂದರೆ ಅಂತಹವರಲ್ಲಿ ಸಾವಿನ ಬೋಧನೆಗೆ ಹೆಚ್ಚು ಪ್ರಾಮುಖ್ಯತೆ ಇರುತ್ತದೆ.

ಇದು ಬೇರೆಯೇ ಆಗಿದ್ದರೆ, ಜೇಡಗಳು ಬೇರೆಯದೇ ಬೋಧನೆ ಮಾಡುತ್ತಿದ್ದವು: ಹಿಂದೆ ಇವರೇ ಪ್ರಪಂಚವನ್ನು ಅತೀ ಹೆಚ್ಚು ನಿಂದಿಸಿದವರು ಮತ್ತು ಭಿನ್ನಾಭಿಪ್ರಾಯ ಹೊಂದಿದವರನ್ನು ಸುಟ್ಟವರು.

ಈ ಸಮಾನತೆಯ ಬೋಧಕರೊಂದಿಗೆ ನನ್ನನ್ನು ಹೋಲಿಸಬೇಡಿ. ಏಕೆಂದರೆ ನ್ಯಾಯವು ನನಗೆ "ಮನುಷ್ಯರು ಸಮಾನರಲ್ಲ." ಎಂದು ಹೇಳುತ್ತದೆ.

ಮತ್ತು ಅವರು ಸಮಾನರಾಗಬಾರದು ಕೂಡ! ನಾನು ಬೇರೆ ರೀತಿ ಮಾತನಾಡಿದರೆ ಅತಿಮಾನವನ ಮೇಲಿನ ನನ್ನ ಪ್ರೀತಿಗೆ ಅರ್ಥವೇನಿದೆ?

ಸಾವಿರಾರು ಸೇತುವೆಗಳು ಮತ್ತು ಹಾದಿಗಳ ಮೂಲಕ ಅವರು ಭವಿಷ್ಯದತ್ತ ನುಗ್ಗಲಿ, ಮತ್ತು ಅವರ ನಡುವೆ ಯುದ್ಧ ಹಾಗೂ ಅಸಮಾನತೆ ಹೆಚ್ಚಾಗುತ್ತಿರಲಿ: ನನ್ನ ಮಹಾನ್ ಪ್ರೀತಿಯೇ ನನ್ನನ್ನು ಹೀಗೆ ಮಾತನಾಡಿಸುತ್ತಿದೆ!

ಅವರು ತಮ್ಮ ವೈರತ್ವದಲ್ಲಿ ಹೊಸ ಚಿತ್ರಗಳನ್ನು ಮತ್ತು ಭೂತಗಳನ್ನು ಸೃಷ್ಟಿಸಲಿ, ಮತ್ತು ಆ ಚಿತ್ರಗಳ ಮೂಲಕವೇ ಪರಸ್ಪರ ಅತ್ಯುನ್ನತ ಹೋರಾಟವನ್ನು ಮಾಡಲಿ!

ಒಳ್ಳೆಯದು ಮತ್ತು ಕೆಟ್ಟದ್ದು, ಶ್ರೀಮಂತ ಮತ್ತು ಬಡವ, ಉನ್ನತ ಮತ್ತು ಕೀಳು—ಇವೆಲ್ಲವೂ ಶಸ್ತ್ರಾಸ್ತ್ರಗಳಾಗಲಿ ಮತ್ತು ಜೀವನವು ತನ್ನನ್ನು ತಾನೇ ಮತ್ತೆ ಮತ್ತೆ ಜಯಿಸಬೇಕು ಎಂಬುದರ ಸಂಕೇತಗಳಾಗಲಿ!

ಜೀವನವು ಕಂಬಗಳು ಮತ್ತು ಮೆಟ್ಟಿಲುಗಳ ಮೂಲಕ ಮೇಲಕ್ಕೆ ಏರಲು ಬಯಸುತ್ತದೆ: ಅದು ದೂರದ ದಿಗಂತಗಳನ್ನು ಮತ್ತು ಪರಮಾನಂದದ ಸೌಂದರ್ಯವನ್ನು ನೋಡಲು ಹಂಬಲಿಸುತ್ತದೆ—ಅದಕ್ಕಾಗಿಯೇ ಅದಕ್ಕೆ ಎತ್ತರದ ಅಗತ್ಯವಿದೆ!

ಮತ್ತು ಅದಕ್ಕೆ ಎತ್ತರದ ಅಗತ್ಯವಿರುವುದರಿಂದಲೇ, ಅದಕ್ಕೆ ಮೆಟ್ಟಿಲುಗಳು ಮತ್ತು ಹತ್ತುವವರ ವಿರೋಧದ ಅಗತ್ಯವಿದೆ! ಜೀವನವು ಹತ್ತಲು ಮತ್ತು ಹತ್ತುತ್ತಾ ತನ್ನನ್ನು ತಾನೇ ಮೀರಲು ಬಯಸುತ್ತದೆ.

ಇಲ್ಲಿ ನೋಡಿ ನನ್ನ ಸ್ನೇಹಿತರೇ! ಈ ಜೇಡದ ಬಲೆಯಿರುವಲ್ಲೇ ಪುರಾತನ ದೇವಾಲಯವೊಂದರ ಅವಶೇಷಗಳು ಎದ್ದು ನಿಂತಿವೆ—ನಿಮ್ಮ ಜ್ಞಾನದ ಕಣ್ಣುಗಳಿಂದ ಅಲ್ಲಿ ನೋಡಿ!

ನಿಜವಾಗಿಯೂ, ಇಲ್ಲಿ ಯಾರು ಕಲ್ಲಿನಲ್ಲಿ ತನ್ನ ಆಲೋಚನೆಗಳನ್ನು ಮೇಲೆ ಮೇಲೆ ಜೋಡಿಸಿದ್ದಾನೋ, ಅವನಿಗೆ ಜೀವನದ ರಹಸ್ಯವು ಮಹಾನ್ ಜ್ಞಾನಿಗೆ ತಿಳಿದಂತೆ ತಿಳಿದಿತ್ತು!

ಸೌಂದರ್ಯದಲ್ಲೂ ಹೋರಾಟ ಮತ್ತು ಅಸಮಾನತೆ ಇದೆ ಎಂಬುದು, ಮತ್ತು ಅಧಿಕಾರಕ್ಕಾಗಿ ಯುದ್ಧ ನಡೆಯುತ್ತದೆ ಎಂಬುದು—ಅವನು ಇಲ್ಲಿ ಅತ್ಯಂತ ಸ್ಪಷ್ಟವಾದ ರೂಪಕದ ಮೂಲಕ ನಮಗೆ ಬೋಧಿಸುತ್ತಿದ್ದಾನೆ.

ಇಲ್ಲಿ ಕಮಾನುಗಳು ಮತ್ತು ಗೋಪುರಗಳು ಕುಸ್ತಿ ಪಂದ್ಯದಂತೆ ಹೇಗೆ ದೈವಿಕವಾಗಿ ಒಂದಕ್ಕೊಂದು ಹೊಂದಿಕೊಂಡಿವೆ: ಬೆಳಕು ಮತ್ತು ನೆರಳುಗಳು ದೈವಿಕವಾಗಿ ಪರಸ್ಪರ ಹೇಗೆ ಸ್ಪರ್ಧಿಸುತ್ತಿವೆ—

ನನ್ನ ಸ್ನೇಹಿತರೇ, ನಾವು ಕೂಡ ಅಷ್ಟೇ ಸುರಕ್ಷಿತವಾಗಿ ಮತ್ತು ಸುಂದರವಾಗಿ ಶತ್ರುಗಳಾಗೋಣ! ನಾವು ದೈವಿಕವಾಗಿ ಪರಸ್ಪರ ವಿರುದ್ಧ ಹೋರಾಡೋಣ!—

ಅಯ್ಯೋ! ಇಲ್ಲಿ ನನ್ನ ಹಳೆಯ ವೈರಿ ಜೇಡ ನನ್ನನ್ನೇ ಕಚ್ಚಿತು! ದೈವಿಕವಾಗಿ ಸುರಕ್ಷಿತವಾಗಿ ಮತ್ತು ಸುಂದರವಾಗಿ ಅದು ನನ್ನ ಬೆರಳನ್ನು ಕಚ್ಚಿತು!

"ಶಿಕ್ಷೆ ಮತ್ತು ನ್ಯಾಯ ಇರಲೇಬೇಕು—ಎಂದು ಅದು ಭಾವಿಸುತ್ತದೆ: ಅವನು ಇಲ್ಲಿ ಸುಮ್ಮನೆ ಶತ್ರುತ್ವದ ಗೌರವಾರ್ಥ ಹಾಡುಗಳನ್ನು ಹಾಡಬಾರದು!" ಎನ್ನುತ್ತದೆ.

ಹೌದು, ಅದು ತನ್ನ ಪ್ರತೀಕಾರ ತೀರಿಸಿಕೊಂಡಿದೆ! ಅಯ್ಯೋ, ಈಗ ಅದು ನನ್ನ ಆತ್ಮವನ್ನೂ ಪ್ರತೀಕಾರದಿಂದ ತಲೆತಿರುಗಿಸಲು ಬಯಸುತ್ತಿದೆ!

ನನಗೆ ತಲೆತಿರುಗದೇ ಇರಬಹುದು, ಆದರೆ ನನ್ನ ಸ್ನೇಹಿತರೇ, ನನ್ನನ್ನು ಈ ಕಂಬಕ್ಕೆ ಕಟ್ಟಿಬಿಡಿ! ನಾನು ಪ್ರತೀಕಾರದ ಸುಳಿಗಾಳಿಯಾಗುವುದಕ್ಕಿಂತ, ಸ್ತಂಭ-ಸಂತನಾಗಿರುವುದನ್ನೇ ಇಷ್ಟಪಡುತ್ತೇನೆ!

ನಿಜವಾಗಿ, ಜರಥುಷ್ಟ್ರನು ಚಂಡಮಾರುತವಲ್ಲ; ಮತ್ತು ಅವನು ನೃತ್ಯಗಾರನಾದರೂ, ಜೇಡ-ನೃತ್ಯಗಾರನಲ್ಲ!

—ಹೀಗೆ ಜರಥುಷ್ಟ್ರನು ಮಾತನಾಡಿದನು।